اسلام آباد۔21جنوری (اے پی پی) وزیر مملکت موسمیاتی تبدیلی زرتاج گل آکھیے جو ترقی یافتہ ملکاں کوں موسمیاتی تبدیلیاں دے اثرات روکݨ کیتے آپدیاں ذمے واریاں پوریاں کرݨیاں ہوسن ، پاکستان ایں حوالے نال اپݨے حصے توں ودھ تے کردار ادا کریندا پئے ، صاف ساوا پاکستان تحریک اچ معاشرے دے ہر طبقے کوں رلایا ڳئے ۔’’اے پی پی دی سرائیکی نیوز سروس دی انچارج ڈاکٹر سعدیہ کمال کوں اپݨے خصوصی انٹرویو اچ وزیر مملکت آکھیے جو نویں منتخب امریکی صدر جوبائیڈن دی طرفوں پیرس معاہدے اچ ول واپس آوݨ دے اعلان دا خیر مقدم کریندوں ، انہاں آکھیے جو موسمیاتی تبدیلیاں دی وجہ بݨݨ آلیاں گرین ہائوس گیساں دے اخراج دے ذمے وار وݙے صنعتی ملک ہن ، انہاں ایندے سدباب کیتے مالی وسائل ، ٹیکنالوجی ٹرانسفر اتے استعداد کار ودھاوݨ بارے عالمی وعدے کر رکھئن جنہاں کوں پورا کرݨ انہاں دی ذمہ واری اے ۔زرتاج گل آکھیے جو پاکستان دا آلودگی دا سبب بݨݨ آلیاں گرین ہاؤس گیساں دے خارج تھیوݨ اچ حصہ نہ ہووݨ دے برابر اے لیکن اے موسمیاتی تبدیلیاں توں ساریں توں ودھ متاثر تھیوݨ آلے ملکاں اچ شامل اے ۔ انھاں آکھیے ایندے باوجود پاکستان اپݨے محدود وسائل دے نال موسمیاتی تبدیلی دے اثرات کوں گھٹ کرݨ اچ چنڳاں کردار نبھیندا پئے ۔
انہاں آکھیے جو پاکستان دا گلوبل وارمنگ اچ حصہ نہ ہووݨ دے برابر اے ۔ایندے باوجود گنجائش موجود ہووݨ تے انسداد دے اقدامات کیتن تے ترقی یافتہ ملک آپ دے یقین ݙیواوݨ تے عمل درآمد کرن تاں جو پاکستان جیہے ملک ترقی پذیر ملکاں کوں انہاں دیاں کوششاں اچ مدد مل سڳے ۔موجودہ حکومت ولوں موسمیاتی تبدیلی دے اثرات گھٹ کرݨ متعلق اقدامات بارے انہاں آکھیےجو اساݙی حکومت دے ڈوں سالاں اچ اتی کم تھئن جیڑھے گزریل 70 سال اچ وی نئیں کیتے ڳئے ، وزیراعظم عمران خان دی قیادت اچ موجودہ حکومت 10بلین ٹری سونامی پراجیکٹ، کلین اینڈ گرین پاکستان، ریچارج پاکستان، کلائمیٹ سمارٹ ایگریکلچر پروگرام اتے پلاسٹک بیگز تے پابندی جیہے وݙے منصوبے شروع کیتے جنہاں دی ماضی اچ مثال نی ملدی ۔ انہاں آکھیے جو صاف ساوا پاکستان تحریک اچ معاشرے دے سارے طبقیاں کوں رلایا ڳے تاں جو ایں حوالے نال قومی رویں وچ بہتری گھن آئی ونڄ سڳے ۔ ہک سوال دے جواب اچ زرتاج گل آکھیے جو پاکستان کوں ماحولیات دے تحفظ اتے موسمیاتی تبدیلی دےاثرات کوں گھٹ کرݨ کیتے آپدیاں ذمے واریاں دا چنڳی طرح پتہ ہے پیا اتے ایں حوالے نال سارے ممکن اقدامات وی کریندا پئے ، ترقی پذیر ملکاں کوں مالی معاونت، ٹیکنالوجی ٹرانسفر اتے استعداد کار ودھاوݨ اچ تعاون کیتے ترقی یافتہ ملکاں کوں قائل کرݨ کیتے وزیراعظم عمران خان قائدانہ ادا کریسن ۔
